safar ke baad bhi zauq-e-safar na rah jaae — Abhishek Shukla

us se kahnaa ki dhuaan dekhne laaiq hogaa
aag pahne hue main jaaungaa paani ki taraf

chalte hue mujh mein kahin Thahraa huaa tu hai
rasta nahin manzil nahin achchhaa huaa tu hai

jaane kyaa kuchh ho chhupaa tum mein mohabbat ke sivaa
ham tasalli ke liye phir se khagaaleinge tumhein

main sochtaa huun bahut zindagi ke baare mein
ye zindagi bhi mujhe soch kar na rah jaae

main yuun hi nahin apni hifaazat mein lagaa huun
mujh mein kahin lagtaa hai ki rakkhaa huaa tu hai

kabhi kabhi to ye vahshat bhi ham pe guzri hai
ki dil ke saath hi dekhaa hai Dubnaa shab kaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

safar mein aise kai marhale bhi aate hain
har ek moD pe kuchh log chhuT jaate hain

yuun to maujud apne ghar mein hai
aadmi mustaqil safar mein hai

zamin ki god mein itnaa sukun thaa 'anjum'
ki jo gayaa vo safar ki thakaan bhuul gayaa

asaatiza ne miraa haath thaam rakkhaa hai
isi liye to main pahunchaa huun apni manzil par