ye imtiyaaz zaruri hai ab ibaadat mein — Abhishek Shukla

kabhi kabhi to ye vahshat bhi ham pe guzri hai
ki dil ke saath hi dekhaa hai Dubnaa shab kaa

us se kahnaa ki dhuaan dekhne laaiq hogaa
aag pahne hue main jaaungaa paani ki taraf

chalte hue mujh mein kahin Thahraa huaa tu hai
rasta nahin manzil nahin achchhaa huaa tu hai

jaane kyaa kuchh ho chhupaa tum mein mohabbat ke sivaa
ham tasalli ke liye phir se khagaaleinge tumhein

main sochtaa huun bahut zindagi ke baare mein
ye zindagi bhi mujhe soch kar na rah jaae

safar ke baad bhi zauq-e-safar na rah jaae
khayaal o khvaab mein ab ke bhi ghar na rah jaae

khush-nasibi hai tumhaari sar pe hai jo maan kaa haath
ham yatimon ko pata hai ye du'aa kyaa chiiz hai

baaqi hi kyaa rahaa hai tujhe maangne ke baad
bas ik duaa mein chhuT gae har duaa se ham

kyaa kyaa duaaein maangte hain sab magar 'asar'
apni yahi duaa hai koi muddaaa na ho

ishq mein shikva kufr hai aur har iltijaa haraam
toD de kaasa-e-muraad ishq gadaagari nahin

kahin giri to hai bijli zaraa nazar kiije
kisi gharib ki palTi hui duaa to nahin

kis qadar teri duaaon mein asar thaa ai dost
ho gayaa huun main sehat-yaab davaa se pahle