vo aa rahaa thaa magar main nikal gayaa kahin aur — Abul Hasanat Haqqi

apne manzar se alag hotaa nahin hai koi rang
apni aankhon ke sivaa baad-e-bahaari aur kyaa

badan khud apni hi tajsim kar nahin paate
qarib aayaa to aankhon ko khvaab main ne diyaa

main apne zahr se vaaqif huun vo samajhtaa nahin
hai mere kisa-e-sad-kaam mein sharaafat bhi

vo mehrbaan nahin hai to phir khafaa hogaa
koi to raabta us ko bahaal rakhnaa hai

ye sach hai us se bichhaD kar mujhe zamaana huaa
magar vo lauTnaa chaahe to phir zamaana bhi kyaa

duur rahtaa hai magar jumbish-e-lab bos-o-kanaar
Dubtaa rahtaa hai dariyaa mein kinaaraa kyaa kyaa

ai shaam-e-hijr-e-yaar miri tu gavaahi de
main tere saath saath rahaa ghar nahin gayaa

vasl par dil hi kisi kaa na ho maail jab tak
hijr ki puuri zarurat nahin ki jaa sakti

yaa-rab gham-e-hijraan mein itnaa to kiyaa hotaa
jo haath jigar par hai vo dast-e-duaa hotaa

sabr hijraan mein kare 'kaifi'-e-mahzun kab tak
aakhir ai dost koi hadd-e-shakebaai hai

kitnaa aasaan thaa tire hijr mein marnaa jaanaan
phir bhi ik umr lagi jaan se jaate jaate

vo hijratein hon hijr ho yaa qissa-e-visaal
aa phir se mere naam sabhi vaaqiaat kar