vo hijratein hon hijr ho yaa qissa-e-visaal — Naheed Virk

kitni viraani hai mere andar
kis qadar teri kami hai mujh mein

reza reza honaa bantaa hai miraa
tum mukammal mere dil par utre ho

kitni khvaahishein dil mein palti hain magar 'naahid'
haath hi naiin aate bhaagte hue lamhe

zindagi is qadar buri bhi nahin
dekh main muskuraa rahi huun naa

aur phir dil ne us ko chhoD diyaa
jab ta'alluq bahaal thaa hi nahin

shaam ki shaam se sargoshi suni thi ik baar
bas tabhi se tujhe imkaan mein rakkhaa huaa hai

is balaa ko to khudaa jald kare shahr-badar
kaale paani ko ravaana shab-e-hijraan ho jaae

kis qadar hijr mein behoshi hai
jaagnaa bhi hai hamaaraa sonaa

raat thaa vasl aaj hijr kaa din
kuchh zamaane kaa e'tibaar nahin

hijr mein us but-e-kaafir ke taDapte hain paDe
ahl-e-zunnaar kahin saahib-e-islaam kahin

'faraaz' ishq ki duniyaa to khub-surat thi
ye kis ne fitna-e-hijr-o-visaal rakkhaa hai

hijr mein muskuraae jaa dil mein use talaash kar
naaz-e-sitam uThaae jaa raaz-e-sitam na faash kar