ye khulaa jism khule baal ye halke malbus — Afroz Alam

har khvaab shikasta hai taamir-e-nasheman kaa
har subh ke maathe par baazaar ki garmi hai

tumhaari guftugu se aas ki khushbu chhalakti hai
jahaan tum ho vahaan pe zindagi maalum hoti hai

gum-sum saa khaDaa hai koi darvaaza-e-dil par
is shaam kaa manzar to dil-aavez bahut hai

main zehni taur pe aavaara hotaa jaataa huun
mire shuur mujhe apni had ke andar khinch

sataati hai tumhaari yaad jab mujh ko shab-e-hijraan
mujhe khud apni hasti ajnabi maalum hoti hai

taarikh bataaegi vo qatra hai ki dariyaa
aansu hai abhi vaqt ke qadmon mein paDaa hai

hai shaam-e-avadh gesu-e-dildaar kaa partav
aur subh-e-banaras hai rukh-e-yaar kaa partav

koi hangaama-e-hayaat nahin
raat khaamosh hai sahar khaamosh

gham-e-firaaq ko siine se lag ke sone do
shab-e-tavil ki hogi sahar kabhi na kabhi

ishq ki duniyaa mein kyaa kyaa ham ko saughaatein milin
suuni subhein roti shaamein jaagti raatein milin

subh hoti hai to kunj-e-khush-gumaani mein kahin
pheink di jaati hai shab bhar ki siyaahi baandh kar

shab ki divaar giri to dekhaa
nok-e-nashtar hai sahar kuchh bhi nahin