sataati hai tumhaari yaad jab mujh ko shab-e-hijraan — Afroz Alam

har khvaab shikasta hai taamir-e-nasheman kaa
har subh ke maathe par baazaar ki garmi hai

ye khulaa jism khule baal ye halke malbus
tum nai subh kaa aaghaaz karoge shaayad

tumhaari guftugu se aas ki khushbu chhalakti hai
jahaan tum ho vahaan pe zindagi maalum hoti hai

gum-sum saa khaDaa hai koi darvaaza-e-dil par
is shaam kaa manzar to dil-aavez bahut hai

main zehni taur pe aavaara hotaa jaataa huun
mire shuur mujhe apni had ke andar khinch

taarikh bataaegi vo qatra hai ki dariyaa
aansu hai abhi vaqt ke qadmon mein paDaa hai

mere khvaabon ke jharokon ko sajaate rahiye
na sahi vasl magar yaad to aate rahiye

nasha kar lein nashe kaaTein manaaein hijr yaadon kaa
hamein maan baap ne is vaaste thoDe hi paalaa thaa

rahne de taklif-e-tavajjoh dil ko hai aaraam bahut
hijr mein teri yaad bahut hai gham mein teraa naam bahut

vo kisi bhule hue naghme ki dhun ke maanind
zehn mein hai to magar yaad nahin aataa hai

ishq jis se ho tiri raah taki jaati hai
hijr jis se ho tujhe yaad kiyaa jaataa hai

hamin ne hashr uThaa rakkhaa hai bichhaDne par
vo jaan-e-jaan to pareshaan bhi ziyaada nahin