ai shab-e-gham mire muqaddar ki — Aghaz Barni

ab agar ishq ke aasaar nahin badleinge
ham bhi pairaaya-e-izhaar nahin badleinge

qad kaa andaaza tumhein ho jaaegaa
apne saae ko ghaTaa kar dekhnaa

main khud se chhupaa lekin
us shakhs pe uryaan thaa

use suljhaaun kaise
main khud uljhaa huaa huun

mire ehsaas ke aatish-fishaan kaa
agar ho to mire dil tak dhuaan ho

main to bas ye chaahtaa huun vasl bhi
do dilon ke darmiyaan haael na ho

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

husn jalva dikhaa gayaa apnaa
ishq baiThaa rahaa udaas kahin

kafan ki qimat suneinge murde to is ke sadme se ji uTheinge
janaaza uTThegaa ab kisi kaa na ab kisi kaa mazaar hogaa

gham-e-vajud kaa maatam karun to kaise jiyun
magar khudaa tire daaman pe daagh hai ki nahin