zindagi ke bahut qarib na jaa — Akmal Imaam

fasaad rokne kam-zarf log pahunche hain
gharon mein rah gae raushan zamir jitne the

meraa saaya bhi baDh gayaa mujh se
is saliqe se ghaT gayaa huun main

aarzu Tiis karb tanhaai
khud mein kitnaa simaT gayaa huun main

nai tahqiq ne qatron se nikaale dariyaa
ham ne dekhaa hai ki zarron se zamaane nikle

har ek harf se jiine kaa fan numaayaan ho
kuchh is tarah ki ibaarat nisaab mein likhiye

zehn mein ajnabi samton ke hain paikar lekin
dil ke aaine mein sab aks puraane nikle

kam-umri mein sunet hain
mar jaate hain achchhe log

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

zindagi yuun to nayaa lafz nahin hai lekin
vaqt ke saath nae is ke ma'aani nikle

aankhein hain ek 'umr se girvi rakhi huiin
dukh kaa vo qarz hai ki utaaraa nahin gayaa

haasil-e-zindagi hai vo lamha
jab tu mujh se lipaT ke royaa thaa