har ek harf se jiine kaa fan numaayaan ho — Akmal Imaam

fasaad rokne kam-zarf log pahunche hain
gharon mein rah gae raushan zamir jitne the

meraa saaya bhi baDh gayaa mujh se
is saliqe se ghaT gayaa huun main

aarzu Tiis karb tanhaai
khud mein kitnaa simaT gayaa huun main

nai tahqiq ne qatron se nikaale dariyaa
ham ne dekhaa hai ki zarron se zamaane nikle

zindagi ke bahut qarib na jaa
faasla kuchh to apne dhyaan mein rakh

zehn mein ajnabi samton ke hain paikar lekin
dil ke aaine mein sab aks puraane nikle

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

gham hai na ab khushi hai na ummid hai na yaas
sab se najaat paae zamaane guzar gae

main jis mein rah na sakaa ji-huzuriyon ke sabab
ye aadmi hai usi kaamyaab mausam kaa

vo na aaegaa hamein maalum thaa is shaam bhi
intizaar us kaa magar kuchh soch kar karte rahe