avval avval 'ilm faqat ik nuqta thaa — Allama Talib Jauhari

in gali kuchon mein bahnon kaa muhaafiz kaun hai
kasb-e-zar ki dauD mein basti se maan-jaae gae

pahunchi dilon ki aag hamaare khiyaam tak
lekin dhuaan to jaaegaa darbaar-e-shaam tak

ek kuein ki gahraai se misr ke takht-e-shaahi tak
dekhne vaali aankh ko kitne naadida baazaar mile

bichhDe the to saakit palkein sukhe peD ki shaakhein thiin
us se bichhaD kar duur chale to koson tak sailaab rahaa

jism ne apni 'umr guzaari sindh ke registaanon mein
dil kam-bakht baDaa ziddi thaa aakhir tak panjaab rahaa

kar rahe hain zindagi mein maa'naviyyat ki talaash
khvaab mein Duubaa huaa taalaab sahraa aur main

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

jinhein ye fikr nahin sar rahe rahe na rahe
vo sach hi kahte hain jab bolne pe aate hain

kuchh log jo khaamosh hain ye soch rahe hain
sach boleinge jab sach ke zaraa daam baDheinge

fikr-e-fardaa gham-e-imroz gham-e-maut-o-hayaat
aadmi kyaa huaa majmua-e-aalaam huaa

yuun mohabbat kaa badal kuchh bhi nahin
sochtaa huun itnaa haq de duun tumhein

bas itnaa soch kar hi mujh ko apne paas tum rakh lo
tumhaare vaaste main hukmaraani chhoD aayaa huun