ajiib khvaab thaa aankhon mein niind chhoD gayaa — Alok Mishra

kyuun bataataa nahin koi kuchh bhi
aakhir aisaa bhi kyaa huaa hai mujhe

khud-kushi jaisi koi baat nahin
ik zaraa mujh ko bad-gumaani hai

mujhe pata hai ki rone se kuchh nahin hotaa
nayaa saa dukh hai to thoDaa chhalak gayaa huun main

sab sitaare dilaasa dete hain
chaand raaton ko chikhtaa hai bahut

kyaa zarurat hai mujh ko chehre ki
kaun chehre se jaantaa hai mujhe

main bhi bikhraa huaa huun apnon mein
vo bhi tanhaa saa apne ghar mein hai

mere khvaabon ke jharokon ko sajaate rahiye
na sahi vasl magar yaad to aate rahiye

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

isi khanDar mein mire khvaab ki gali bhi thi
gali mein peD bhi thaa peD par samar bhi thaa

shab palang par haanpte saae rahe
khvaab darvaaze khaDaa taktaa rahaa

sab baDe zoam se aae the nae surat-gar
sab ke daaman se vahi khvaab puraane nikle

mili na jab unhein taabir apne khvaabon ki
phir apni aankhon ko nilaam kar diyaa sab ne