mili na jab unhein taabir apne khvaabon ki — Zafar Iqbal Zafar

vo zabt thaa ki aah na nikli zabaan se
dil pe hamaare kitne hi khanjar guzar gae

aap dariyaa ki ravaani se na uljhein hargiz
tah mein us ke koi girdaab bhi ho saktaa hai

hamaari ziist mein aise bhi lamhe aate hain aksar
daraaron ke tavassut se havaa deti hain divaarein

tahzib hi baaqi hai na ab sharm-o-hayaa kuchh
kis darja ab insaan ye bebaak huaa hai

raabta kyuun rakhun main dariyaa se
pyaas bujhti hai meri sahraa se

us jaisaa dusraa na samaayaa nigaah mein
kitne hasin aankhon se paikar guzar gae

mere khvaabon ke jharokon ko sajaate rahiye
na sahi vasl magar yaad to aate rahiye

afsos umr kaT gai ranj-o-malaal mein
dekhaa na khvaab mein bhi jo kuchh thaa khayaal mein

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

ab vo baatein na vo raatein na mulaaqaatein hain
mahfilein khvaab ki surat huiin viraan kyaa kyaa

vaqt lafzon se banaai hui chaadar jaisaa
oDh letaa huun to sab khvaab hunar lagtaa hai