kyaa zarurat hai mujh ko chehre ki — Alok Mishra

kyuun bataataa nahin koi kuchh bhi
aakhir aisaa bhi kyaa huaa hai mujhe

khud-kushi jaisi koi baat nahin
ik zaraa mujh ko bad-gumaani hai

mujhe pata hai ki rone se kuchh nahin hotaa
nayaa saa dukh hai to thoDaa chhalak gayaa huun main

sab sitaare dilaasa dete hain
chaand raaton ko chikhtaa hai bahut

main bhi bikhraa huaa huun apnon mein
vo bhi tanhaa saa apne ghar mein hai

ajiib khvaab thaa aankhon mein niind chhoD gayaa
ki niind guzri hai mujh ko zalil karte hue

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kyon tasavvur mein ji rahaa huun main
jab haqiqat mein mar hi jaanaa hai

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

duniyaa gharib jaan ke hansti thi 'mir' par
'iqbaal' mujh pe aise ye duniyaa hansi ki bas

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa