us ne rakkhaa thaa haath saahil par — Amaan Ali Khan

khush-nasibi hai tumhaari sar pe hai jo maan kaa haath
ham yatimon ko pata hai ye du'aa kyaa chiiz hai

shab-e-gham ki yuun bhi main kartaa huun 'izzat
ye shab 'umr mein mujh se kaafi baDi hai

kuchh der to Dare tiri jaadugari se ham
phir dekhne lage tujhe sanjidgi se ham

main ne dafnaae vaaldain apne
mujh se puchho ki hausla kyaa hai

saath jab chhoD gae meraa tum ai kuza-gar
khud ko majburi mein phir khud hi taraashaa main ne

dhuein ne bhinch di chikhein tabhi pata ye chalaa
ki ghar mein ek daricha bahut zaruri hai

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

haal to daryaaft kar lete the ab vo bhi nahin
khaamushi pahle hamaare darmiyaan aisi na thi

achchhaa 'amal samajh ke jo dariyaa mein Daal diin
dil kartaa hai vo nekiyaan paani se khinch luun

aankhon se kyaa ret giregi
dariyaa to ab suukh chukaa hai

aankhon se ik dariyaa niklaa
dariyaa se kuchh laashein niklin

kahin bujhti hai dil ki pyaas ik do ghunT se 'anzar'
main suraj huun mire hisse mein dariyaa likh diyaa jaae