aankhon se kyaa ret giregi — Aslam Rashid

kuchh sazaa aur baDh gai is par
zakhm khaae to muskuraae kyon

mujh se baahar nikal rahe the sab
main bhi hairaan saa nikal aayaa

din din bhar aaina dekhaa jaataa hai
tab jaa kar do chaar ishaare bante hain

aap kaa to shauq hai jalte gharon ko dekhnaa
aap aankhein nam kareinge aap rahne dijiye

qabr par phuul rakhne aayaa thaa
phir yahin ghar banaa liyaa main ne

hansi un ke labon tak aa gai hai
mukammal ho gayaa ronaa hamaaraa

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

miri is chashm-e-tar se abr-e-baaraan ko hai kyaa nisbat
ki vo dariyaa kaa paani aur ye khun-e-dil hai barsaati

sab ummidein mire aashob-e-tamannaa tak thiin
bastiyaan ho gaiin gharqaab to dariyaa utraa

tum apnaa dariyaa yahaan se sameT lo varna
hamaari pyaas ki garmi use jalaa degi

hasti hai judaai se us ki jab vasl huaa to kuchh bhi nahin
dariyaa mein na thaa to qatra thaa dariyaa mein milaa to kuchh bhi nahin

ai khudaa tu hi be-misaal nahin
main bhi huun kaaenaat mein tanhaa