aashiq kaa baankpan na gayaa baad-e-marg bhi — Ameer Minai

phir baiThe baiThe vaada-e-vasl us ne kar liyaa
phir uTh khaDaa huaa vahi rog intizaar kaa

aafat to hai vo naaz bhi andaaz bhi lekin
martaa huun main jis par vo adaa aur hi kuchh hai

maani hain main ne saikaDon baatein tamaam umr
aaj aap ek baat miri maan jaaiye

vo dushmani se dekhte hain dekhte to hain
main shaad huun ki huun to kisi ki nigaah mein

khudaa ne nek surat di to sikho nek baatein bhi
bure hote ho achchhe ho ke ye kyaa bad-zabaani hai

kaun si jaa hai jahaan jalva-e-maashuq nahin
shauq-e-didaar agar hai to nazar paidaa kar

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

sau fasaad ek ishq mein uTThe
boyaa ik tukhm uge hazaar darakht

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin