niind kyuun TuuT gai aakhir-e-shab — Anjum Ludhianvi

khushbuein phuuT ke roi hongi
gul havaaon mein jo bikhraa hogaa

dhuup nikli hai baarishon ke baad
vo abhi ro ke muskuraae hain

dosti bandagi vafaa-o-khulus
ham ye shama jalaanaa bhuul gae

khud-kushi karne mein bhi naakaam rah jaate hain ham
kaun amrit ghol detaa hai hamaare zahr mein

rang hi se fareb khaate rahein
khushbuein aazmaanaa bhuul gae

subh kaa khvaab umr bhar dekhaa
aur phir niind aa gai 'anjum'

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

shor din ko nahin sone detaa
shab ko sannaaTaa jagaa detaa hai

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

ajal bhi Tal gai dekhi gai haalat na aankhon se
shab-e-gham mein musibat si musibat ham ne jheli hai