subh kaa khvaab umr bhar dekhaa — Anjum Ludhianvi

dhuup nikli hai baarishon ke baad
vo abhi ro ke muskuraae hain

dosti bandagi vafaa-o-khulus
ham ye shama jalaanaa bhuul gae

niind kyuun TuuT gai aakhir-e-shab
kaun mere liye taDpaa hogaa

khud-kushi karne mein bhi naakaam rah jaate hain ham
kaun amrit ghol detaa hai hamaare zahr mein

rang hi se fareb khaate rahein
khushbuein aazmaanaa bhuul gae

khushbuein phuuT ke roi hongi
gul havaaon mein jo bikhraa hogaa

kam-umri mein sunet hain
mar jaate hain achchhe log

bas ek pal ki tamannaa-e-vasl ki khaatir
tamaam 'umr lagaa di gai sanvarne mein

meri saari zindagi ko be-samar us ne kiyaa
umr meri thi magar us ko basar us ne kiyaa

jiinaa taDap taDap kar marnaa sisak sisak kar
fariyaad ek ji hai kyaa kyaa kharaabiyon mein

umr hi teri guzar jaaegi un ke hal mein
teraa bachcha jo savaalaat liye baiThaa hai

zindagi tu bhi hamein vaise hi ik roz guzaar
jis tarah ham tujhe barson se guzaare hue hain