aaj 'anjum' muskuraa kar us ne phir dekhaa mujhe — Anjum Manpuri

vatan ke log sataate the jab vatan mein the
vatan ki yaad sataati hai jab vatan mein nahin

ye do-dili mein rahaa ghar na ghaaT kaa 'anjum'
buton ko kar na sakaa khush khudaa ko paa na sakaa

na puchh us ki dil-afsurdagi ki kaifiyyat
jo gham-nasib khushi mein bhi muskuraa na sakaa

kaam 'anjum' kaa jo tamaam kiyaa ye aap ne vaaqai khuub kiyaa
kam-bakht isi ke laaeq thaa ab aap abas pachhtaate hain

apni anaa ki aaj bhi taskin ham ne ki
ji bhar ke us ke husn ki tauhin ham ne ki

kyon tasavvur mein ji rahaa huun main
jab haqiqat mein mar hi jaanaa hai

bas is khayaal se kahin duniyaa na dekh le
likh kar tumhaaraa naam miTaanaa paDaa hamein

na aae mere honTon tak jo paimaana nahin aataa
miri khuddaariyon ko haath phailaanaa nahin aataa

miri anaa ne sabaq de ke khud-parasti kaa
chhuDaa diyaa hai zamaane ki bandagi se mujhe

ham ne duniyaa se suluk aisaa kiyaa hai 'raanaa'
ham na honge to bahut yaad karegi duniyaa