ham fitratan insaan hain farishte to nahin hain — Anwar Jamal Anwar

sach ye hai ham hi mohabbat kaa sabaq paDh na sake
varna an-paDh to na the ham ko paDhaane vaale

shahr ki galiyon aur saDkon par phirte hain maayusi mein
kaash koi 'anvar' se puchhe aise be-ghar kitne hain

tumhaare dil mein koi aur bhi hai mere sivaa
gumaan to hai zaraa saa magar yaqin nahin

husn aisaa ki zamaane mein nahin jis ki misaal
aur jamaal aisaa ki DhunDaa kare har khvaab-o-khayaal

kaisaa maqaam aayaa mohabbat ki raah mein
dil ro rahaa hai meraa magar aankh tar nahin

daaman pe to har ek ke chhiTein hain khuun ki
ab kis se puchhiye ki gunahgaar kaun hai

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

khudaa ki us ke gale mein ajiib qudrat hai
vo boltaa hai to ik raushni si hoti hai

farz hai dariyaa-dilon par khaaksaaron ki madad
farsh sahraa ke liye laazim huaa sailaab kaa

ratb-o-yaabis mein hai tasarruf-e-ishq
aankh dariyaa hai dil jazira hai

yuun dard ne ummid ke laD se mujhe baandhaa
dariyaaon ko jis tarah kinaaraa kare koi

mayassar se ziyaada chaahtaa hai
samundar jaise dariyaa chaahtaa hai