shahr ki galiyon aur saDkon par phirte hain maayusi mein — Anwar Jamal Anwar

sach ye hai ham hi mohabbat kaa sabaq paDh na sake
varna an-paDh to na the ham ko paDhaane vaale

tumhaare dil mein koi aur bhi hai mere sivaa
gumaan to hai zaraa saa magar yaqin nahin

husn aisaa ki zamaane mein nahin jis ki misaal
aur jamaal aisaa ki DhunDaa kare har khvaab-o-khayaal

ham fitratan insaan hain farishte to nahin hain
daavaa ye karein kaise ki laghzish nahin karte

kaisaa maqaam aayaa mohabbat ki raah mein
dil ro rahaa hai meraa magar aankh tar nahin

daaman pe to har ek ke chhiTein hain khuun ki
ab kis se puchhiye ki gunahgaar kaun hai

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

letaa huun maktab-e-gham-e-dil mein sabaq hanuz
lekin yahi ki raft gayaa aur buud thaa

gham mujhe dete ho auron ki khushi ke vaaste
kyuun bure bante ho tum naahaq kisi ke vaaste

sunaa ye hai ki vo suufi bhi thaa vali bhi thaa
ab is ke baa'd to paighambari kaa darja hai