kuchh der us ne dekh liyaa chaand ki taraf — Aqeel Nomani

puchho zaraa ye kaun si duniyaa se aae hain
kuchh log kah rahe hain hamein koi gham nahin

anginat safinon mein diip jagmagaate hain
raat ne luTaayaa hai rang-o-nur paani par

ab sang-baariyon kaa amal sard paD gayaa
ab us taraf bhi ranj mire TuTne kaa hai

be-sabab donon mein har ek ko dilchaspi thi
aur har ek se bezaar the ham bhi tum bhi

hamein bhi vaqt ke tufaan mil kar khaa gae aakhir
har ik kashti ko mil jaataa hai saahil ham bhi kahte the

jis ko chaahaa bas usi kaa raasta takte rahe
pattharon ki justuju mein khud ko patthar kar liyaa

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

mujhe dushman se bhi khuddaari ki ummid rahti hai
kisi kaa bhi ho sar qadmon mein sar achchhaa nahin lagtaa

Dar ham ko bhi lagtaa hai raste ke sannaaTe se
lekin ek safar par ai dil ab jaanaa to hogaa

jidhar jaate hain sab jaanaa udhar achchhaa nahin lagtaa
mujhe paamaal raston kaa safar achchhaa nahin lagtaa