koi lashkar yahaan se guzraa hai — Arif Shafiq

mujhe khudaa ne vo bakhshaa hai shaa'iri kaa hunar
jo khvaab dekhtaa huun vo dikhaa bhi saktaa huun

yaqin ab ho gayaa main sach huun 'aarif
jabhi duniyaa mujhe jhuTlaa rahi hai

gharib-e-shahr to faaqe se mar gayaa 'aarif'
amir-e-shahr ne hiire se khud-kushi kar li

andhe adam vajud ke girdaab se nikal
ye zindagi bhi khvaab hai tu khvaab se nikal

'aarif vo faisle ki ghaDi bhi 'ajib thi
dil ko sanbhaalnaa paDaa mizaan ki tarah

'aarif'-husain dhokaa sahi apni zindagi
is zindagi ke baa'd ki haalat bhi hai fareb

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

yuun to maujud apne ghar mein hai
aadmi mustaqil safar mein hai

safar mein aise kai marhale bhi aate hain
har ek moD pe kuchh log chhuT jaate hain

khud hi jaane lage the aur khud hi
raasta rok kar khaDe hue hain

asaatiza ne miraa haath thaam rakkhaa hai
isi liye to main pahunchaa huun apni manzil par