na aayaa gham bhi mohabbat mein saazgaar mujhe — Asad Bhopali

aise iqraar mein inkaar ke sau pahlu hain
vo to kahiye ki labon pe na tabassum aae

itnaa to bataa jaao khafaa hone se pahle
vo kyaa karein jo tum se khafaa ho nahin sakte

ai mauj-e-havaadis tujhe maalum nahin kyaa
ham ahl-e-mohabbat hain fanaa ho nahin sakte

na bazm apni na apnaa saaqi na shisha apnaa na jaam apnaa
agar yahi hai nizaam-e-hasti to zindagi ko salaam apnaa

haalaat ne kisi se judaa kar diyaa mujhe
ab zindagi se zindagi mahrum ho gai

ishq ko jab husn se nazrein milaanaa aa gayaa
khud-ba-khud ghabraa ke qadmon mein zamaana aa gayaa

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

shab-e-firaaq kuchh aisaa khayaal-e-yaar rahaa
ki raat bhar dil-e-gham-dida be-qaraar rahaa

kyaa rashk hai ki ek kaa hai ek muddai
tum dil mein ho to dard hamaare jigar mein hai

aaj phir dab gaiin dard ki siskiyaan
aaj phir gunjtaa qahqaha rah gayaa