karam par bhi hotaa hai dhokaa sitam kaa — Asar Lakhnavi

palkein ghaneri gopiyon ki Toh liye hue
raadhaa ke jhaankne kaa jharoka ghazab ghazab

aaj kuchh mehrbaan hai sayyaad
kyaa nasheman bhi ho gayaa barbaad

baat khote jo iltijaa karte
ai dil-e-naa-muraad kyaa karte

jo sazaa diije hai bajaa mujh ko
tujh se karni na thi vafaa mujh ko

sanaa teri nahin mumkin zabaan se
maaani duur phirte hain bayaan se

qaasid payaam un kaa na kuchh der abhi sunaa
rahne de mahv-e-lazzat-e-zauq-e-khabar mujhe

dhokaa na khaao chaaraagaro vaaqiaat se
pahlu mein dil nahin hai to kyaa dard bhi nahin

tu aur chashm-e-lutf nai vaardaat hai
meri nigaah ne mujhe dhokaa diyaa na ho

ghunchon kaa fareb-e-husn tauba kaanTon se nibaah chaahtaa huun
dhoke diye hain doston ne dushman ki panaah chaahtaa huun

na karein aap vafaa ham ko kyaa
bevafaa aap hi kahlaaiyegaa

ham ne aalam se bevafaai ki
ek maashuq-e-bevafaa ke liye

har ik surat pe dhokaa khaa rahi hain teri surat kaa
abhi aataa nahin nazron ko taa-hadd-e-nazar jaanaa