ghunchon kaa fareb-e-husn tauba kaanTon se nibaah chaahtaa huun — Unknown

log kaanTon se bach ke chalte hain
main ne phulon se zakhm khaae hain

dil TuTne se thoDi si taklif to hui
lekin tamaam umr ko aaraam ho gayaa

duniyaa mein vahi shakhs hai taazim ke qaabil
jis shakhs ne haalaat kaa rukh moD diyaa ho

miri namaaz-e-janaaza paDhi hai ghairon ne
mare the jin ke liye vo rahe vazu karte

ye hamin hain ki tiraa dard chhupaa kar dil mein
kaam duniyaa ke ba-dastur kiye jaate hain

jin ke kirdaar se aati ho sadaaqat ki mahak
un ki tadris se patthar bhi pighal sakte hain

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

jab ki pahlu se yaar uThtaa hai
dard be-ikhtiyaar uThtaa hai

meri armaan bhari aankh ki taasir hai ye
jis ko main pyaar se dekhungaa vahi tu hogaa

gali gali miri yaad bichhi hai pyaare rasta dekh ke chal
mujh se itni vahshat hai to meri hadon se duur nikal

khayaali doston ke aks se kheloge kab tak
mere bachche kabhi mil lo bhare ghar mein kisi se

tanhaai se aati nahin din raat mujhe niind
yaa-rab miraa ham-khvaab o ham-aaghosh kahaan hai