jaane vaale ko kahaan rok sakaa hai koi — Aslam Ansari

divaar-e-khastagi huun mujhe haath mat lagaa
main gir paDungaa dekh mujhe aasraa na de

kise kahein ki rifaaqat kaa daagh hai dil par
bichhaDne vaalaa to khul kar kabhi milaa hi na thaa

khafaa na ho ki tiraa husn hi kuchh aisaa thaa
main tujh se pyaar na kartaa to aur kyaa kartaa

jise darpesh judaai ho use kyaa maalum
kaun si baat ko kis tarah bayaan honaa hai

ham ko pahchaan ki ai bazm-e-chaman-zaar-e-vajud
ham na hote to tujhe kis ne sanvaaraa hotaa

hamaare haath faqat ret ke sadaf aae
ki saahilon pe sitaara koi rahaa hi na thaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kyon tasavvur mein ji rahaa huun main
jab haqiqat mein mar hi jaanaa hai

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

jaane kis rang se ruThegi tabiat us ki
jaane kis Dhang se ab us ko manaanaa hogaa

kisi din meri rusvaai kaa ye kaaran na ban jaae
tumhaaraa shahr se jaanaa miraa bimaar ho jaanaa