tumhaare hijr mein jab bhi calendar par nigaah Daali — Ateeb Quadri

jin ki ungli thaam ke chalnaa sikhaa thaa
haae ab un ko buDhaa hote dekhnaa hai

koi kashti kahin maghrur ho jaae na paani mein
sukut-e-bahr ko qasdan talaatum honaa paDtaa hai

agli naslein kar sakein tafriq-e-duniyaa-o-iram
maaon ke qisson mein bhi shaddaad honaa chaahiye

puchhne vaalon ne puchhaa haath kaise jal gayaa
kaise batlaaein kisi ke dil pe rakkhaa thaa kabhi

hamaare sar pe pech-o-kham kaa ye saafa viraasat hai
ki tum pagDi samajhte ho jise ham taaj kahte hain

na ranj-e-hijrat thaa aur na shauq-e-safar thaa dil mein
sab apne apne gunaah kaa bojh Dho rahe the

miri zindagi to guzri tire hijr ke sahaare
miri maut ko bhi pyaare koi chaahiye bahaana

aaj na jaane raaz ye kyaa hai
hijr ki raat aur itni raushan

ham musaafir hain gard-e-safar hain magar ai shab-e-hijr ham koi bachche nahin
jo abhi aansuon mein nahaa kar gae aur abhi muskuraate palaT aaeinge

ishq par faaez huun auron ki tarah lekin mujhe
vasl kaa lapkaa nahin hai hijr se vahshat nahin

hijr ke tapte mausam mein bhi dil un se vaabasta hai
ab tak yaad kaa pattaa pattaa Daali se paivasta hai