aaina aaina tairtaa koi aks — Ateequllah

fazaa mein haath to uTThe the ek saath kai
kisi ke vaaste koi duaa na kartaa thaa

tum ne to faqat us ki rivaayat hi suni hai
ham ne vo zamaana bhi guzarte hue dekhaa

zaraa se rizq mein barkat bhi kitni hoti thi
aur ik charaagh se kitne charaagh jalte the

ye raah-e-talab yaaro gumraah bhi karti hai
saamaan usi kaa thaa jo be-sar-o-saamaan thaa

kuchh badan ki zabaan kahti thi
aansuon ki zabaan mein thaa kuchh

kuchh aur din abhi is jaa qayaam karnaa thaa
yahaan charaagh vahaan par sitaara dharnaa thaa

mere khvaabon ke jharokon ko sajaate rahiye
na sahi vasl magar yaad to aate rahiye

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

main so rahaa huun tire khvaab dekhne ke liye
ye aarzu hai ki aankhon mein raat rah jaae

bikharte khvaabon se taabir ke dhundlakon tak
muhaajrat ne kachoke bahut lagaae hain

dekhi thi ek raat tiri zulf khvaab mein
phir jab talak jiyaa main pareshaan hi rahaa

ik adhuraa khvaab jo aksar Daraataa thaa mujhe
teraa jaanaa us adhure khvaab ki taa'bir hai