aaj tak yaad hai vo shaam-e-judaai kaa samaan — Azeem Murtaza

ab imtiyaaz-e-zaahir-o-baatin bhi miT gayaa
dil chaak ho rahaa hai garebaan ke saath saath

kyaa kyaa faraaghatein thiin mayassar hayaat ko
vo din bhi the ki tere sivaa koi gham na thaa

khulus-e-niyat-e-rahbar pe munhasir hai 'azim'
maqaam-e-ishq bahut duur bhi hai paas bhi hai

dard-e-mahrumi-e-jaaved bhi ik daulat hai
ahl-e-gham bhi tire sharminda-e-ehsaan nikle

kuchh naqsh tiri yaad ke baaqi hain abhi tak
dil be-sar-o-saamaan sahi viraan to nahin hai

ek dard-e-hasti ne umr bhar rifaaqat ki
varna saath detaa hai kaun aakhiri dam tak

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

chiyunTiyon ki tarah hain chimTi hui
teri yaadon ne maar Daalaa hai

kaun aataa hai ayaadat ke liye dekhein 'faraagh'
apne ji ko zaraa naa-saaz kiye dete hain

'umr guzri magar mohabbat mein
ek lamha bhi yaadgaar nahin

manzil pe nazar aai bahut duri-e-manzil
be-saakhta aane lage sab raah-numaa yaad