subh kaisi hai vahaan shaam ki rangat kyaa hai — Azhar Adeeb

is liye main ne muhaafiz nahin rakkhe apne
mire dushman mire is jism se baahar kam hain

ai shahr-e-sitam chhoD ke jaate hue logo
ab raah mein koi bhi madina nahin aataa

usi ne sab se pahle haar maani
vahi sab se dilaavar lag rahaa thaa

der lagti hai bahut lauT ke aate aate
aur vo itne mein hamein bhuul chukaa hotaa hai

ham ne ghar ki salaamti ke liye
khud ko ghar se nikaal rakkhaa hai

hamaare naam ki takhti bhi un pe lag na saki
lahu mein gundh ke miTTi jo ghar banaae gae

aankhon mein meri subh-e-qayaamat gai jhamak
siine se us pari ke jo parda ulaT gayaa

roza rakhtaa huun subuhi pi ke hangaam-e-sahar
shaam ko masjid mein hotaa huun jamaaat kaa sharik

haan dikhaa de ai tasavvur phir vo subh o shaam tu
dauD pichhe ki taraf ai gardish-e-ayyaam tu

'taabish' jo guzarti hi nahin shaam ki had se
sochein to vahin raat sahar-khez bahut hai

niind aati nahin to subah talak
gard-e-mahtaab kaa safar dekho

shab-e-daraaz kaa hai qissa mukhtasar 'kaifi'
hui sahar ke ujaalon mein gum charaagh ki lau