hamaare naam ki takhti bhi un pe lag na saki — Azhar Adeeb

ai shahr-e-sitam chhoD ke jaate hue logo
ab raah mein koi bhi madina nahin aataa

usi ne sab se pahle haar maani
vahi sab se dilaavar lag rahaa thaa

der lagti hai bahut lauT ke aate aate
aur vo itne mein hamein bhuul chukaa hotaa hai

ham ne ghar ki salaamti ke liye
khud ko ghar se nikaal rakkhaa hai

tu apni marzi ke sabhi kirdaar aazmaa le
mire baghair ab tiri kahaani nahin chalegi

is liye main ne muhaafiz nahin rakkhe apne
mire dushman mire is jism se baahar kam hain

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

pyaaso raho na dasht mein baarish ke muntazir
maaro zamin pe paanv ki paani nikal paDe