shab-e-daraaz kaa hai qissa mukhtasar 'kaifi' — Haneef Kaifi

anaa anaa ke muqaabil hai raah kaise khule
taalluqaat mein haail hai baat ki divaar

bikhar ke ret hue hain vo khvaab dekhe hain
miri nigaah ne kitne saraab dekhe hain

koi bhi rut ho mili hai dukhon ki fasl hamein
jo mausam aayaa hai us ke itaab dekhe hain

sab nazar aate hain chehre gard gard
kyaa hue be-aab aaine tamaam

apni jaanib nahin ab lauTnaa mumkin meraa
Dhal gayaa huun main saraapaa tire aaine mein

muddatein guzrin mulaaqaat hui thi tum se
phir koi aur na aayaa nazar aaine mein

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

shor din ko nahin sone detaa
shab ko sannaaTaa jagaa detaa hai

ek khushbu si ubharti hai nafas se mere
ho na ho aaj koi aan basaa hai mujh mein

tujh se kyaa subh talak saath nibhegaa ai umr
shab-e-furqat ki jo ghaDiyon kaa guzarnaa hai yahi

an-kahi an-suni si kuchh baatein
suune din aur ye sunsaan raatein