main ne ye soch ke boe nahin khvaabon ke darakht — Aziz Bano Darab Wafa

ahmiyat kaa mujhe apni bhi to andaaza hai
tum gae vaqt ki maanind ganvaa do mujh ko

ek muddat se khayaalon mein basaa hai jo shakhs
ghaur karte hain to us kaa koi chehra bhi nahin

ham aise surmaa hain laD ke jab haalaat se palTe
to baDh ke zindagi ne pesh kiin baisaakhiyaan ham ko

main jab bhi us ki udaasi se uub jaaungi
to yuun hansegaa ki mujh ko udaas kar degaa

shiv to nahin ham phir bhi ham ne duniyaa bhar ke zahr piye
itni kaDvaahaT hai munh mein kaise miThi baat karein

aaj kam-az-kam khvaabon hi mein mil ke pi lete hain, kal
shaayad khvaabon mein bhi khaali paimaane Takraaein log

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

jinhein ye fikr nahin sar rahe rahe na rahe
vo sach hi kahte hain jab bolne pe aate hain

jab fikron par baadal se manDlaate honge
insaan ghaT kar saae se rah jaate honge

apne darvaaze pe baiThaa sochtaa rahtaa huun main
meraa ghar ajdaad ki baara-dari kaa karb hai

vo jahaan chaahe chalaa jaae ye us kaa ikhtiyaar
sochnaa ye hai ki main khud ko kahaan le jaaungaa

koi khat-vat nahin phaaDaa koi tohfa nahin toDaa
ki vo dekhe to khud soche ki dil toDaa nahin toDaa