vo jahaan chaahe chalaa jaae ye us kaa ikhtiyaar — Chandrabhan Khayal

vaqt aur haalaat par kyaa tabsira kiije ki jab
ek uljhan dusri uljhan ko suljhaane lage

nazar mein shokh shabihein liye hue hai sahar
abhi na koi idhar se dhuaan dhuaan guzre

sochtaa huun to aur baDhti hai
zindagi hai ki pyaas hai koi

apni divaaron se kuchh baahar nikal
sirf khaali ghar ke baam-o-dar na dekh

shahr mein jurm-o-havaadis is qadar hain aaj-kal
ab to ghar mein baiTh kar bhi log ghabraane lage

paas se dekhaa to jaanaa kis qadar maghmum hain
an-ginat chehre ki jin ko shaadmaan samjhaa thaa main

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

jinhein ye fikr nahin sar rahe rahe na rahe
vo sach hi kahte hain jab bolne pe aate hain

ishq mein fikr to divaana banaa deti hai
pyaar ko aql nahin dil ki panaahon mein rakho

zaat mein jis ki ho Thahraav zamin ki maanind
fikr mein us ki samundar ki si vusat hogi

ai shaaer! teraa dard baDaa ai shaaer! teri soch baDi
ai shaaer! tere siine mein is jaisaa laakh bahe dariyaa

avvalin chaal se aage nahin sochaa main ne
ziist shatranj ki baazi thi so main haar gayaa