aisi khvaahish ko samajhtaa huun main bilkul natural — Aziz Faisal

ishq mein ye tafraqa-baazi bahut maayub hai
pyaar ko shiia vahaabi aur sunni mat samajh

das baara ghazliyaat jo rakhtaa hai jeb mein
bazm-e-sukhan mein hai vo nishaani vabaal ki

na ye qaanun kaam aayaa thaa raanjhe ke zaraa saa bhi
usi ko bhains milti hai ho jis ke haath mein laaThi

begam se kah rahaa thaa ye koi khalaa-navard
baiThi hui hai chaand pe ''guDiyaa'' mire liye

kitni mazaahiya hai ye botal ke jin ki baat
aaqaa ab inqalaab hai do chaar din ki baat

moarrikh likh na dein suqraat mujh ko
main lassi kaa piyaala pi rahaa huun

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

bin maange mil rahaa ho to khvaahish fuzul hai
suraj se raushni ki guzaarish fuzul hai

ek bosa miri tankhvaah mile na mile
aarzu hai ki na qadmon se ye naukar chhuTe

nazar-e-taghaaful-e-yaar kaa gila kis zabaan siin karun bayaan
ki sharaab-e-sad-qadah aarzu khum-e-dil mein thi so bhari rahi

main so rahaa huun tire khvaab dekhne ke liye
ye aarzu hai ki aankhon mein raat rah jaae

ajiib vaqt hai ab doston ke chaaqu ko
mire qalam ki nahin ungliyon ki hasrat hai