bahut thaa khauf jis kaa phir vahi qissaa nikal aayaa — Bashar Nawaz

karoge yaad to har baat yaad aaegi
guzarte vaqt ki har mauj Thahar jaaegi

de nishaani koi aisi ki sadaa yaad rahe
zakhm ki baat hai kyaa zakhm to bhar jaaeinge

ye ehtimaam-e-charaaghaan bajaa sahi lekin
sahar to ho nahin sakti diye jalaane se

pyaar ke bandhan khuun ke rishte TuuT gae khvaabon ki tarah
jaagti aankhein dekh rahi thiin kyaa kyaa kaarobaar hue

kahte kahte kuchh badal detaa hai kyuun baaton kaa rukh
kyuun khud apne-aap ke bhi saath vo sachchaa nahin

jaane kin rishton ne mujh ko baandh rakkhaa hai ki main
muddaton se aandhiyon ki zad mein huun bikhraa nahin

donon ke dil mein khauf thaa maidaan-e-jang mein
donon kaa khauf faasla thaa darmiyaan kaa

leaderi chaaho to lafz-e-qaum hai mehmaan-navaaz
gap-navison ko aur ahl-e-mez ko raazi karo

khauf aankhon mein miri dekh ke chingaari kaa
kar diyaa raat ne suraj ke havaale mujh ko

ye aur baat ki 'akhtar' haveliyaan na rahin
khanDar mein kam to nahin apni aabru raushan

din ke siine mein dhaDakte hue lamhon ki qasam
shab ki raftaar-e-subuk-gaam se ji Dartaa hai

Dar rahaa huun ki sar-e-shaam tiri aankhon mein
main ne jo vaqt guzaaraa hai koi dekh na le