karoge yaad to har baat yaad aaegi — Bashar Nawaz

de nishaani koi aisi ki sadaa yaad rahe
zakhm ki baat hai kyaa zakhm to bhar jaaeinge

ye ehtimaam-e-charaaghaan bajaa sahi lekin
sahar to ho nahin sakti diye jalaane se

pyaar ke bandhan khuun ke rishte TuuT gae khvaabon ki tarah
jaagti aankhein dekh rahi thiin kyaa kyaa kaarobaar hue

kahte kahte kuchh badal detaa hai kyuun baaton kaa rukh
kyuun khud apne-aap ke bhi saath vo sachchaa nahin

jaane kin rishton ne mujh ko baandh rakkhaa hai ki main
muddaton se aandhiyon ki zad mein huun bikhraa nahin

koi yaadon se joD le ham ko
ham bhi ik TuTtaa saa rishta hain

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

manzar thaa raakh aur tabiat udaas thi
har-chand teri yaad mire aas paas thi

dil kaa kamra raushni se bhar gayaa
jab jalaa dipak tumhaari yaad kaa

ijz ke saath chale aae hain ham 'yazdaani'
koi aur un ko manaa lene kaa Dhab yaad nahin

zakhm risne lagaa hai phir shaayad
yaad us ne kiyaa hai phir shaayad