ijz ke saath chale aae hain ham 'yazdaani' — Yazdani Jalandhari

bazm-e-vafaa saji to ajab silsile hue
shikve hue na un se na ham se gile hue

shama hogi subh tak baaqi na parvaane ki khaak
ahl-e-mahfil ki zabaan par daastaan rah jaaegi

milaa hai taptaa sahraa dekhne ko
chale the ghar se dariyaa dekhne ko

zindagi koh-e-be-sutun goyaa
har nafas ek taisha-e-farhaad

mere khvaabon ke jharokon ko sajaate rahiye
na sahi vasl magar yaad to aate rahiye

yaadon ke nasheman ko jalaayaa to nahin hai
ham ne tujhe is dil se bhulaayaa to nahin hai

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

judaai kyuun dilon ko aur bhi nazdik laati hai
bichhaD kar kyuun ziyaada pyaar kaa ehsaas hotaa hai

vo shakhs yaadon kaa mujh ko ghulaam karte hue
gayaa bhi to miri nindein haraam karte hue

dihaat ke vajud ko qasba nigal gayaa
qasbe kaa jism shahr ki buniyaad khaa gai