lobaan mein chingaari jaise koi rakh jaae — Bashir Badr

na tum hosh mein ho na ham hosh mein hain
chalo mai-kade mein vahin baat hogi

bhuul shaayad bahut baDi kar li
dil ne duniyaa se dosti kar li

ik shaam ke saae tale baiThe rahe vo der tak
aankhon se ki baatein bahut munh se kahaa kuchh bhi nahin

khudaa aise ehsaas kaa naam hai
rahe saamne aur dikhaai na de

hasin to aur hain lekin koi kahaan tujh saa
jo dil jalaae bahut phir bhi dilrubaa hi lage

khudaa ki itni baDi kaaenaat mein main ne
bas ek shakhs ko maangaa mujhe vahi na milaa

mere khvaabon ke jharokon ko sajaate rahiye
na sahi vasl magar yaad to aate rahiye

kisi ki yaad manaane mein iid guzregi
so shahr-e-dil mein bahut duur tak udaasi hai

aadhi se ziyaada shab-e-gham kaaT chukaa huun
ab bhi agar aa jaao to ye raat baDi hai

rahti hai shab-o-roz mein baarish si tiri yaad
khvaabon mein utar jaati hain ghanghor si aankhein

yuun tujhe dekh ke chaunk uThti hain soi yaadein
jaise sannaaTe mein aavaaz lagaa de koi

naqaab-e-shab mein chhup kar kis ki yaad aai samajhte hain
ishaare ham tire ai sham-e-tanhaai samajhte hain