mahlon mein ham ne kitne sitaare sajaa diye — Bashir Badr

na tum hosh mein ho na ham hosh mein hain
chalo mai-kade mein vahin baat hogi

bhuul shaayad bahut baDi kar li
dil ne duniyaa se dosti kar li

ik shaam ke saae tale baiThe rahe vo der tak
aankhon se ki baatein bahut munh se kahaa kuchh bhi nahin

khudaa aise ehsaas kaa naam hai
rahe saamne aur dikhaai na de

hasin to aur hain lekin koi kahaan tujh saa
jo dil jalaae bahut phir bhi dilrubaa hi lage

khudaa ki itni baDi kaaenaat mein main ne
bas ek shakhs ko maangaa mujhe vahi na milaa

vo chaand hai to aks bhi paani mein aaegaa
kirdaar khud ubhar ke kahaani mein aaegaa

main kahkashaaon mein khushiyaan talaashne niklaa
mire sitaare meraa chaand sab udaas rahe

aaya na phir bhi chaand utar kar zamin par
karte rahe darakht ishaare tamaam raat

hazaaron chaand sitaare chamak gae hote
kabhi nazar jo tiri maail-e-karam hoti

chaand ke husn ki tasvir banaane vaale
mere mahbub kaa chehra nahin dekhaa tu ne

shab bhar shab-e-visaal rahaa chaandni kaa lutf
soyaa lipaT ke vo mah-e-taabaan tamaam raat