aaya na phir bhi chaand utar kar zamin par — Wafa Naqvi

ek hi rang mein jiine kaa hunar sikhaa hai
ham se har baat pe chehra nahin badlaa jaataa

is bhiiD mein duniyaa ki ham tum na bichhaD jaaein
main tum pe nazar rakkhun tum mujh pe nazar rakhnaa

ab ye khvaahish hai karein log hamaari ghibat
phail jaaein tiri galiyon mein khabar ki surat

ab un se paai hai taklif to shikaayat kyaa
hamin ne sar pe chaDhaayaa thaa kuchh kaminon ko

bas ek pal ki tamannaa-e-vasl ki khaatir
tamaam 'umr lagaa di gai sanvarne mein

zamin uThegi nahin aasmaan jhukegaa nahin
anaa-parast hain donon ke khaandaan bahut

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

shor din ko nahin sone detaa
shab ko sannaaTaa jagaa detaa hai

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

ek manzar mein lipTe badan ke sivaa
sard raaton mein kuchh aur dikhtaa nahin

gayaa thaa maangne khushbu main phuul se lekin
phaTe libaas mein vo bhi gadaa lagaa mujh ko

baam-o-dar ki raushni phir kyuun bulaati hai mujhe
main nikal aayaa thaa ghar se ik shab-e-taarik mein