dil lagaa lete hain ahl-e-dil vatan koi bhi ho — Basir Sultan Kazmi

kaise yaad rahi tujh ko
meri ik chhoTi si bhuul

jab bhi mile ham un se unhon ne yahi kahaa
bas aaj aane vaale the ham aap ki taraf

kuchh to hassaas ham ziyaada hain
kuchh vo barham ziyaada hotaa hai

'baasir' tumhein yahaan kaa abhi tajraba nahin
bimaar ho? paDe raho, mar bhi gae to kyaa

ruk gayaa haath tiraa kyuun 'baasir'
koi kaanTaa to na thaa phulon mein

gilaa bhi tujh se bahut hai magar mohabbat bhi
vo baat apni jagah hai ye baat apni jagah

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

ham ne sab ko muflis paa ke toD diyaa dil kaa kashkol
ham ko koi kyaa de degaa kyuun munh-dekhi baat karein

vaqt haakim hai kisi roz dilaa hi degaa
dil ke sailaab-zada shahr pe qabza mujh ko

chupke chupke vo paDh rahaa hai mujhe
dhire dhire badal rahaa huun main