ruk gayaa haath tiraa kyuun 'baasir' — Basir Sultan Kazmi

kaise yaad rahi tujh ko
meri ik chhoTi si bhuul

jab bhi mile ham un se unhon ne yahi kahaa
bas aaj aane vaale the ham aap ki taraf

dil lagaa lete hain ahl-e-dil vatan koi bhi ho
phuul ko khilne se matlab hai chaman koi bhi ho

kuchh to hassaas ham ziyaada hain
kuchh vo barham ziyaada hotaa hai

'baasir' tumhein yahaan kaa abhi tajraba nahin
bimaar ho? paDe raho, mar bhi gae to kyaa

gilaa bhi tujh se bahut hai magar mohabbat bhi
vo baat apni jagah hai ye baat apni jagah

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kahaan milegi misaal meri sitamgari ki
ki main gulaabon ke zakhm kaanTon se si rahaa huun

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

gul kiyaa jis ne vo thaa aur magar
shama ne shikva havaaon se kiyaa

us gul ko bhejnaa hai mujhe khat sabaa ke haath
is vaaste lagaa huun chaman ki havaa ke haath

na zikr gul kaa kahin hai na maahtaab kaa hai
tamaam shahr mein charchaa tire shabaab kaa hai