kaise yaad rahi tujh ko — Basir Sultan Kazmi

jab bhi mile ham un se unhon ne yahi kahaa
bas aaj aane vaale the ham aap ki taraf

dil lagaa lete hain ahl-e-dil vatan koi bhi ho
phuul ko khilne se matlab hai chaman koi bhi ho

kuchh to hassaas ham ziyaada hain
kuchh vo barham ziyaada hotaa hai

'baasir' tumhein yahaan kaa abhi tajraba nahin
bimaar ho? paDe raho, mar bhi gae to kyaa

ruk gayaa haath tiraa kyuun 'baasir'
koi kaanTaa to na thaa phulon mein

gilaa bhi tujh se bahut hai magar mohabbat bhi
vo baat apni jagah hai ye baat apni jagah

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

sazaa-e-maut pe fariyaad se to behtar hai
gale lagaa ke kahun daar ko mubaarak baad

muddat hui hai bichhDe hue apne-aap se
dekhaa jo aaj tum ko to ham yaad aa gae

ujaaD ho bhi chukaa miraa dil magar abhi daaghdaar bhi hai
yahi khizaan thi bahaar-dushman jo yaadgaar-e-bahaar bhi hai

mere naghmaat ki taqdir na pahunche tujh tak
meri fariyaad ki qismat ki tujhe chhu aai