mujh ko mazaa hai chheD kaa dil maantaa nahin — Dagh Dehlvi

hazrat-e-'daagh' hai ye kucha-e-qaatil uThiye
jis jagah baiThte hain aap to jam jaate hain

dil hi to hai na aae kyuun dam hi to hai na jaae kyuun
ham ko khudaa jo sabr de tujh saa hasin banaae kyuun

baad muddat ke ye ai 'daagh' samajh mein aayaa
vahi daanaa hai kahaa jis ne na maanaa dil kaa

na ronaa hai tariqe kaa na hansnaa hai saliqe kaa
pareshaani mein koi kaam ji se ho nahin saktaa

sar miraa kaaT ke pachhtaaiyegaa
jhuTi phir kis ki qasam khaaiyegaa

kal tak to aashnaa the magar aaj ghair ho
do din mein ye mizaaj hai aage ki khair ho

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

rakh liyaa baar-e-amaanat sar pe be-khaufi ke saath
aur kyaa kartaa miraa divaana dil tere liye

kabhi un ko milti nahin koi manzil
badalte hain jo har qadam par iraade

nahin hai jis mein teraa ishq vo dil hai tabaahi mein
vo kashti Duub jaaegi na jis mein naa-khudaa hogaa

dil hai shauq-e-vasl mein muztar nazar mushtaaq-e-did
jo hai mashghul apni apni sai-e-laa-haasil mein hai