kabhi un ko milti nahin koi manzil — Raqim Lakhnavi

un ke liye uThaain tabassum ki zahmatein
lenaa paDaa khushi kaa sahaaraa kabhi kabhi

sarf-e-sujud kar ke jabin-e-nazar ko main
mearaaj de rahaa huun tire sang-e-dar ko main

dam bhar agar nasib ho fursat to ponchh lo
peshaaniyon pe gard-e-safar hai musaafiro

ai chashm-e-iltifaat ke maare hue sambhal
ye husn-e-ittifaaq hai husn-e-nazar nahin

main baDaa ho gayaa huun magar bachpanaa
mere dil se kabhi bhi gayaa hi nahin

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

na ho ehsaas to saaraa jahaan hai be-his-o-murda
gudaaz-e-dil ho to dukhti ragein milti hain patthar mein

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

barsaat kaa baadal to divaana hai kyaa jaane
kis raah se bachnaa hai kis chhat ko bhigonaa hai

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi