sab ko bataa diyaa ki main behad udaas huun — Devang Thakur

ghar ke andar itne ghar hain is ko kaise toDun main
yaar kabutar rahte hain is ghar ke raushan-daanon mein

tumhein dekhtaa huun so zinda huun main
mujhe saans aati hai aankhon se ab

sar paTak kar dekhnaa hai ek baar
'ishq ko patthar kahaa thaa 'mir' ne

us ke dil se nikle to ham khud ke dil tak aa pahunche
aanaa jaanaa hotaa rahtaa hai apnaa viraanon mein

milnaa hai teri ruuh se ham ko badan baghair
apnaa libaas-e-jism utaare hue hain ham

mire zavaal ki koi to had muqarrar kar
tiri nazar se musalsal utar rahaa huun main

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

tanhaa hotaa huun to mar jaataa huun main
mere andar tu zinda ho jaataa hai

saunp kar khaana-e-dil gham ko kidhar jaate ho
phir na paaoge agar us ne ye ghar chhoD diyaa

baar-e-gham-e-jahaan bhi hai teraa khayaal bhi
hain kitni vusatein dil-e-aashufta-haal mein