sar paTak kar dekhnaa hai ek baar — Devang Thakur

sab ko bataa diyaa ki main behad udaas huun
itni si baat ko bhi khabar kar diyaa gayaa

ghar ke andar itne ghar hain is ko kaise toDun main
yaar kabutar rahte hain is ghar ke raushan-daanon mein

tumhein dekhtaa huun so zinda huun main
mujhe saans aati hai aankhon se ab

us ke dil se nikle to ham khud ke dil tak aa pahunche
aanaa jaanaa hotaa rahtaa hai apnaa viraanon mein

milnaa hai teri ruuh se ham ko badan baghair
apnaa libaas-e-jism utaare hue hain ham

mire zavaal ki koi to had muqarrar kar
tiri nazar se musalsal utar rahaa huun main

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

mire qalam ki siyaahi mein 'ishq hai teraa
miraa ye naam ye shohrat tiri badaulat hai

naache hai mohabbat ki ye sur taal pe khud hi
dil ko ye hunar yaar sikhaayaa nahin jaataa

yak-ba-yak tark na karnaa thaa mohabbat mujh se
khair jis tarah se aataa thaa vo aataa jaataa

kaamyaabi ki duaaein mujhe dene vaale
main tire ishq mein naakaam huaa jaataa huun