phir marhala-e-khvaab-e-bahaaraan se guzar jaa — Dil Ayubi

ye raah-e-ishq hai aakhir koi mazaaq nahin
saubaton se jo ghabraa gae hon ghar jaaein

is shahr mein to kuchh nahin rusvaai ke sivaa
ai 'dil' ye ishq le ke kidhar aa gayaa tujhe

ye dilchasp vaade ye rangin dilaase
ajab saazishein hain kahaan aa gayaa huun

lamha lamha mujhe viraan kiye detaa hai
bas gayaa mere tasavvur mein ye chehra kis kaa

hasin hai shahr to ujlat mein kyuun guzar jaaein
junun-e-shauq use bhi nihaal kar jaaein

kahaan main abhi tak nazar aa sakaa huun
khudaa jaane kitni tahon mein chhupaa huun

apni anaa ki aaj bhi taskin ham ne ki
ji bhar ke us ke husn ki tauhin ham ne ki

kyon tasavvur mein ji rahaa huun main
jab haqiqat mein mar hi jaanaa hai

ek hi tiir hai tarkash mein to ujlat na karo
aise mauqe pe nishaanaa bhi ghalat lagtaa hai

lahron kaa thartharaanaa kyun-kar pasand aave
yaani nazar mein apni khush-gaatiyaan hain teri

har baat dil ki lab pe nahin laanaa laazmi
kuchh guftugu mein bhi adab aadaab chaahiye

tumhaari yaad mein ai jaan-e-jaanaan
december bhi guzartaa jaa rahaa hai